Летописное известие 1096 г. об усобице в Муромо-Рязанской земле

…Бысть же весть Изяславу яко Олег к Мурому идет, посла Изяслав по воя Суздалю и Ростову, и по Белозерци; и собра воя многы. Олег же посла послы своя ко Изяславу, глаголя: „иди в волость отца своего к Ростову, а то есть волость отца моего; да хошу оттуду поряд сотворити со отцем твоим, се бо мя выгнал из города отца моего; а и ты ли ми не хощеши здеся хлеба моего дать?" и не послуша Изяслав словес сих, надеяся на множество вои. Олег же, сын Святослава Черниговьскаго, поиде ко граду с вои, а Изяслав исполчися пред градом на поли; Олег же поиде к нему полком, и соступишася обои, и бысть брань люта, и убиша ту Изяслава, сына Володимеря Манамаша, внука Всеволожа, сентября 6, вои же его побегоша; се же бысть в лето 6604. Олег же вниде во град, и приняша и граждане; Изяслава же вземше положиша и в монастыри святаго Спаса, и оттуду принесоша и к Новугороду, и положиша и во святей Софии, на левой стране. Олег же по приятии града изыма Ростовци, и Белозерци, и Суждальци, и покова их. И поиде Суждалю, и Суздалци вдашася ему; он же люди омири, а иныя изнима, овых же расточи, а имение их взя; и поиде к Ростову, и ти вдашася ему; и прия всю землю Муромскую, и Рязаньскую, и Ростовьскую, и посажа наместници по городом и дани нача брати. И присла к нему Мьстислав Володимеричь послы своя из Новагорода, глаголя: „иди опять к Мурому, а в чюжей волости не сели; аз же послю с молением отщо моему, и смирю тя с ним; аще и брата моего убил еси, то же есть не дивно, в ратех бо и царие и мужие погибают"; Олег же не восхоте сего послушати, но паче мысляще и Новгород прияти. И посла Олег наперед брата своего Ярослава во стражех, а сам стояше на поли у Ростова. Мстислав же сдумав с Новогородци поиде на Олга, посла же перед собою Добрыню Рагуиловича в стороже; Добрыня же и пръвое изыма данникы Олговы. Ярослав же уведав, яко изыма данникы их, стоял бо бе на Медведци в страже, и побеже ко Олгови и поведа ему, яко идет Мьстислав. Олег же поиде к Ростову, а Мьстислав приде на Волгу и поведаша ему, яко воспятился Олег к Ростову. Мьстислав же поиде по нем; и Олег поиде к Суждалю, слышав же, яко Мьстислав идет по нем, и повеле зажещи град Суждаль. токмо остася монастырь Печерьский, церкви святаго Дмитрея. И побеже к Мурому;
   Мьстислав же пришед к Суждалю и ста ту, посылая ко Олгови, мира прося, глаголя: „аз есмь мний тебя, послися ко отцю моему, а дружину вороти, юже еси заял; а яз тебе во всем послушаю". Олег же посла к нему, хотя мира лестию; Мьстислав же им веры льстивым глаголом, и распусти дружину по селом. Наставше бо Феодорове недели святаго поста, в субботу же Феодорову, Мьстиславу же седящу на обеде, прииде ему весть, яко Олег на Клязме, близ бо пришел без вести; Мьстислав бо имя ему веры, и сторожев не постави, но Бог праведных ото льсти спасает. Олег же установися на Клязме, мня, яко убояся Мьстислав побегнет. Ко Мьстиславу же нача дружина совокуплятися в той день наутрии, Новгородци, и Ростовци, и Белозерци, Мьстислав же ста под городом исполчився; и не попусти ни един на единаго 4 дний. И прииде ко Мьстиславу весть, яко посла к нему отец брата его Вячеслава с Половци, и прииде Вячеслав в четверток 2 недели поста, а в пяток, наутрии, поиде Олег исполчився, а Мьстислав поиде противу ему. И вда Мьстислав стяг Володимерь, отца своего, Половчину именем Куную, и вда ему пешци, и постави его на правой руце, и заведе Кунуй пешце и напя стяг Володимерь. И убоялся и ужас нападе на нь и на вои его, и поидоша к боеви противу себе;…


РГПУ им. С.А.Есенина

На главную страницу